Thursday, October 6, 2011

വാക്കമ്മയ്ക്ക്

വാക്കമ്മയ്ക്ക്
വാക്കിന്നു മധുരം ചേര്‍ക്കാന്‍
ചേര്‍ക്ക നീ നിന്‍ കടാക്ഷവും

പോക്കനര്‍ത്ഥങ്ങള്‍ നാക്കിന്മേല്‍

വാക്കിനമ്മേ സരസ്വതീ....


വഴിക്കു വാക്കുകള്‍ തമ്മില്‍

ഏറ്റുമുട്ടുന്നു നിത്യവും

അവര്‍ക്കു വഴികാണിക്കാന്‍

വാക്കിനമ്മേ തുണയ്ക്കുക...


അമ്പലക്കോണിലമ്മയ്ക്കു-

ള്ളാള്‍പൊക്കപ്രതിമയ്ക്കുമേല്‍

ആയുര്‍വേദപ്പരസ്യം ഹാ!

സാരസ്വത ഘൃതപ്പുകള്‍

അഷരം കൂട്ടി വായിച്ചാല്‍
പലതും തെറ്റുമെങ്കിലും
‘ഹരി‘ നാവില്‍ കുറിയ്ക്കാനായ്
കോണ്‍ ട്രാക്ടേറ്റാന്‍ ‘ജഗദ്ഗുരു”


ഉണ്ണിയെ മടിയില്‍ ചേര്‍ത്തു
തൊണ്ടപൊട്ടിച്ചു ചൊല്ലിപോല്‍

‘അരീ സ്രീ ഗണപതായേ”-ഛെ-
ചെക്കന്‍ പൂശീ മുഖത്തതാ.


പലര്‍ക്കും കഴിയാഞ്ഞോരാ

മഹാസാമൂഹ്യ വിപ്ലവം

നടത്തിയമിടുക്കന്‍ നീ

“നഗ്നരാജന്‍” നടുങ്ങിപോല്‍


മകന്‍ അക്ഷര നോവായി-

ട്ടച്ഛന്‍മടിയിരുന്നിതാ

‘അമ്മേ‘ വിളി മുഴക്കുന്നു
അമ്മ ഫോട്ടോ പിടിക്കലില്‍...


അങ്ങു മൂകാംബികാ ക്ഷേത്ര-

പ്പരപ്പില്‍ നിന്നു വാര്‍ത്തകള്‍

ഇങ്ങു കിട്ടുന്നു നമ്മുക്കീ

ഡിജിറ്റല്‍ വിപ്ലവം വഴി

അവള്‍ ചൊല്ലുന്നു വൃത്താന്തം

മംഗ്ലീഷ് ഭാഷയിലിങ്ങനെ

ഇന്നു “വിദ്ധ്യാരംബം നാം
ബാഷയെ കീപ്പു ചെയ്യണം“

വാക്കമ്മേ കാക്കുകെന്നമ്മേ

വാക്കിനെ കാക്കുവാന്‍ സദാ

പേക്കിനാവിങ്കലും ചേര്‍ക്കാ

തിരിക്കാന്‍ ചീത്ത വാക്കിനെ....